Մելիսա Բիլալը Լոս Անջելեսի Կալիֆորնիայի համալսարանի Մերձավոր Արևելքի հետազոտությունների կենտրոնի ականավոր գիտաշխատող է և էթնոերաժշտագիտության ամբիոնի դասախոս: Դոկտոր Բիլալը նաև Հայաստանի Ամերիկյան համալսարանի հումանիտար և սոցիալականգիտությունների ֆակուլտետի դոցենտ է։ Նախկինում նա դասավանդել է հայագիտություն Չիկագոյի համալսարանի հումանիտար գիտությունների ֆակուլտետի Մերձավոր Արևելքի լեզուների և քաղաքակրթությունների բաժնում, աշխատել է Մասաչուսեթսի տեխնոլոգիական ինստիտուտում` (MIT) որպես հրավիրված պատմագետ, Կոլումբիայի համալսարանի` Մերձավոր Արևելքի, Հարավային Ասիայի և Աֆրիկայի ուսումնասիրությունների բաժնում` (MESAAS) որպես հայագիտության հրավիրված դասախոս, Բոազիջի համալսարանում` որպես պատմության դասախոս, Ստամբուլի արևելյան ինստիտուտում` որպես հետդոկտորական ծրագրի գիտաշխատող և Կոլումբիայի համալսարանի «Մելլոն» հետդոկտորական դասավանդման ծրագրի գիտաշխատող երաժշտության գծով:
Նրա հետազոտությունները և հրատարակությունները ներառում են 1915-1922թթ. ցեղասպանության հիշատակի քաղաքականությունը և հիշողության նեոլիբերալ քաղաքականության քննադատությունը Թուրքիայում բռնության, տեղահանության, օտարման և գոյատևման թեմաներով: Նրա ուսումնասիրությունների շրջանակը ներառում է Թուրքիայի հայ համայնքում պատմական գիտելիքների ձևավորումն ու փոխանցումը զգայական մակարդակում, երգեցողությունը և հեքիաթասածությունը որպես վկայության ու բողոքի գործիք, երաժշտության ազգագրության պատմությունն ու քաղաքականությունը և հայկական ֆեմինիզմի պատմությունը:
Մելիսան վերջերս է ավարտել «Ձայնային ստորագրությունները. ռուս-հայկական ռազմագերիների ձայնագրությունները գերմանական համակենտրոնացման ճամբարներում, 1916-1918թթ․», նաև իրականացնում է մի նախագիծ, որի ընթացքում անցկացնում է գաղութատիրական և ռասիստական անցյալի երաժշտաբանական հետազոտություններ:
Այժմ նա աշխատում է «Արթնության օրորոցայինը. սեռը և հայկական հեղափոխության երգը» մենագրության վրա, որը քսաներորդ դարի երաժշտության, հիշողության և հայրենիքի մասին հայկական դիսկուրսի ուսումնասիրություն է: Մելիսան խմբագրել է 2006 թ. «Ճիչ արդարության համար. հինգ հայ ֆեմինիստ գրողներ Օսմանյան կայսրությունից մինչև Թուրքիայի Հանրապետություն (1862–1933)» թուրքերեն գիրքը, և այժմ գործակցում է «Ֆեմինիզմը հայերենով. մեկնաբանականան թոլոգիա և թվային արխիվ» գրքի և թվային հումանիտար գիտությունների վերաբերյալ նախագծի շուրջ, որի կենտրոնում են տասներկու հայ ֆեմինիստ գրողներ, ովքեր ակտիվ գործունեություն են ծավալել օսմանյան և հետօսմանյան համատեքստերում և սփյուռքում:
